ياللي لسه أُمه عايشه ..
خلي بالك من زعلها ..
أصل الأُم وهي عايشة ..
همها تفرح عيالها ..
تفدي عيلها بحياتها ..
وظفره ما تساويه بمالها ..
ظفرة أغلي ..
وهي دي الأم وجمالها ..
فاللي لسه أُمه عايشة ..
خلي بالك من زعلها ..
------------------------------
حملها فيك كان يوم فرحها ..
كات تنام تحلم تشيلك فوق دراعها ..
ويوم ولادتك ..
مــ الفرحة ومن شوقها ليك نسيت وجعها ..
فاوعي يجي يوم وتقسي
أو تهون عليك تبيعها ..
ولو طلبت عينك يا صاحبي إديهالها ..
وياللي لسه أمه عايشه ..
خلي بالك من زعلها ..
-----------------------------
أول يوم فى المدرسة ..
من الفجر صاحية عشان تجهزلك فطارك ..
روح يابني يفتحلك طريقك ..
روح يابني يهديلك صديقك ..
دعوه تنورلك نهارك ..
فيوم ماتنجح ..
وانت راجع البيت تبشر الموجودين ..
إبدأ بأمك ..
هتلاقيها فى انتظارك ..
إجري عليها ..
وبسرعه روح حقق أملها ..
وياللي لسه أمه عايشه ..
خلي بالك من زعلها ..
-------------------------------
يوم جوازك يوم تاريخي ..
ها يا قلبي ..
هي طبيخها يعني أحلي من طبيخي ..
خلي بالك من كلامك وقتها ..
وقلها كل الكلام اللى يريح قلبها ..
متخيبش أملها فيك ..
وافتكر ...
انك حته منها ..
فى النهاية إنت عيل من عيالها ..
فياللي لسه أمه عايشه ..
خلي بالك من زعلها ..
.........................
يوم فراقها بوس ايديها ورجلها.
هي راضية تموت وصابره..
راضيه عنك..
مستنية تجيب كفنها..
تفرح لما الناس تقول..
ابنها شالها ودفنها..
متخليش دعوه تفوتك..
ادعيهلها..
واللي لسه امه عايشه..
خلي بالك من زعلها.
تامر عزت
المشاركات
ليست هناك تعليقات:
إرسال تعليق
في انتظار نصائحكم لتطوير هذه المدونة